ဝန်ကြီးချုပ် ဦးဝင်းသိန်း တောင်ငူခရိုင်အတွင်း သိမ်းဆည်းမြေများနှင့်ပတ်သက်၍ လုပ်ငန်းညှိနှိုင်းအစည်းအဝေးသို့ တက်ရောက်

မေလ (၁၃)ရက်နေ့၊ နံနက်(၉)အချိန်က ပဲခူးတိုင်းဒေသကြီးအစိုးရအဖွဲ့၊ ဝန်ကြီးချုပ် ဦးဝင်းသိန်းသည် တောင်ငူခရိုင်အထွေထွေအုပ်ချုပ်ရေးဦးစီးဌာန၊ ဘုရင့်နောင်ခန်းမ၌ ကျင်းပပြုလုပ်သော တောင်ငူခရိုင်အတွင်း သိမ်းဆည်းမြေများနှင့်ပတ်သက်၍ လုပ်ငန်းညှိနှိုင်းအစည်းအဝေးသို့ တက်ရောက်ခဲ့သည်။

ရှေးဦ:စွာ ဝန်ကြီးချုပ် ဦးဝင်းသိန်းက မြို့ပြ/ကျေးလက် မြေအသုံးချမှု စနစ်တကျဖြစ်စေရေး၊ လိုအပ်ချက်အရ ဌာနဆိုင်ရာများက မြေယာသိမ်းဆည်းထားမှုကို စနစ်တကျ အသုံးချရန်လိုအပ်ကြောင်း၊ မလိုအပ်ပါကလည်း အလျင်အမြန် နိုင်ငံတော်သို့ ပြန်လည်စွန့်လွှတ်ပေးရန် လိုအပ်ကြောင်း၊ ဒါမှလည်း အစိုးရအနေဖြင့် မူလတောင်သူများသို့ စိစစ်လွှဲပြောင်းပေးအပ်ခြင်း၊ အနာဂတ် မြို့ပြ/ကျေးလက် ဒေသဖွံ့ဖြိုးရေးလုပ်ငန်းများတွင် ပြန်လည်အသုံးပြုနိုင်မည်ဖြစ်ကြောင်းနှင့် ဆောင်ရွက်ရမည့် ရုံးလုပ်ငန်းဆိုင်ရာကိစ္စရပ်များကို မြန်မြန်ဆန်ဆန် ဆောင်ရွက်ကြစေလိုကြောင်း ပြောကြားခဲ့သည်။

ထို့နောက် တောင်ငူခရိုင်လယ်ယာမြေစီမံခန့်ခွဲမှုနှင့် စာရင်းအင်းဦးစီးဌာန၊ ခရိုင်ဦးစီးမှူးက တောင်ငူမြို့နယ်အတွင်း ကာကွယ်ရေးဝန်ကြီးဌာန၊ အမှတ်(၃၀၂၉)လေကြောင်းရန် ကာကွယ်ရေးတပ်မှ နိုင်ငံတော်သို့ ပြန်လည်စွန့်လွှတ်သော မြေဧရိယာ(၁၄၀၀.၃၈)ဧကနှင့် ပတ်သက်၍ လက်ရှိမြေပြင်တွင် အသုံးပြုနေမှုအခြေအနေများကိုလည်းကောင်း၊ တောင်ငူခရိုင်ရဲတပ်ဖွဲ့မှူးက ရဲလေ့ကျင့်ရေးသင်တန်းကျောင်း(အခြားအဆင့်) ဖွင့်လှစ်နိုင်ရေးအတွက် မြေနေရာလိုအပ်ချက် အခြေအနေကိုလည်းကောင်း အသေးစိတ် တင်ပြခဲ့သည်။

ယင်းနောက် တက်ရောက်လာသည့် ဌာနဆိုင်ရာများမှ တင်ပြဆွေးနွေးရာ၊ ဝန်ကြီးချုပ်မှ လိုအပ်သည်များ ဖြည့်စွက်လမ်းညွှန်မှာကြားခဲ့ကြောင်း သတင်းရရှိသည်။

Source : ပဲခူးတိုင်းဒေသကြီး အစိုးရအဖွဲ့ သတင်းစာမျက်နှာမှ