တောင်ငူမြို့၊ အဆင့်မြင့်ဈေးသစ်ကြီးအား အမြန်ဆုံးတည်ဆောက်နိုင်ရေး MoU လက်မှတ်ရေးထိုးပွဲကျင်းပ

ဖေဖော်ဝါရီလ (၂၈)ရက်နေ့၊ နံနက်(၉)နာရီအချိန်က ပဲခူးတိုင်းဒေသကြီးအစိုးရအဖွဲ့ရုံး၊ တော်ဝင်ဟံသာခန်းမ၌ တောင်ငူမြို့၊ အဆင့်မြင့်ဈေးသစ်ကြီးအား အမြန်ဆုံးတည်ဆောက်နိုင်ရေး ပဲခူးတိုင်းဒေသကြီးအစိုးရအဖွဲ့နှင့် ဆောက်လုပ်ခွင့်ရ First Altitudez Co., Ltd တို့ MoU လက်မှတ်ရေးထိုးပွဲ ကျင်းပပြုလုပ်ခဲ့သည်။

ရှေးဦးစွာ သယံဇာ၊ သဘာဝပတ်ဝန်းကျင်ထိန်းသိမ်းရေးနှင့် စည်ပင်သာယာရေးဝန်ကြီး ဌာန၊ ဝန်ကြီး ဒေါက်တာစောညိုဝင်းက ဈေးအသစ်ပြန်လည်တည်ဆောက်ရန် ပြည်သူများမှ လိုလားလျက်ရှိပြီး မိမိတို့အစိုးရမှလည်း အမြန်ဆုံးဆောက်လုပ်နိုင်ရန် ကုမ္ပဏီနှင့် MoU(နားလည်မှုစာချွန်လွှာ) လက်မှတ်ရေးထိုးရခြင်းဖြစ်ကြောင်း၊ တောင်ငူဈေးသစ်ကြီး တည်ဆောက်ခြင်းသည် ပြည်သူအကျိုးပြုလုပ်ငန်းဖြစ်၍ စေတနာထားပြီး ဆောင်ရွက်ကြစေလို ကြောင်း ပြောကြားခဲ့သည်။

ထို့နောက် First Altitudez Co., Ltd ဒါရိုက်တာ ဦးအောင်မျိုးခိုင်က တောင်ငူဈေးသစ်ကြီးအား မိမိတို့ကုမ္ပဏီမှ တည်ဆောက်နိုင်ရေး MoU ရေးထိုးနိုင်ခဲ့ပြီးဖြစ်၍ ဈေးတည်ဆောက်ခြင်းလုပ်ငန်းများအား အရှိန်အဟုန်ဖြင့် ဆောင်ရွက်သွားမည်ဖြစ်ကြောင်းနှင့် အစိုးရအဖွဲ့သို့ တင်ပြထားသည့် လုပ်ငန်းစီမံချက်များအတိုင်း အဆင့်ဆင့်ဆောင်ရွက်သွားမည် ဖြစ်ပါကြောင်း ပြောကြားခဲ့သည်။

အဆိုပါ MoU လက်မှတ်ရေးထိုးပွဲသို့ ပဲခူးတိုင်းဒေသကြီးအစိုးရအဖွဲ့၊ ဝန်ကြီးများနှင့် တာဝန်ရှိသူများ၊ စာရင်းစစ်ချုပ်၊ ဥပဒေချုပ်၊ လွှတ်တော်ကိုယ်စားလှယ်များ၊ နိုင်ငံခြားသား ပညာရှင် Mr. Liew S. Shoon၊ တောင်ငူမြို့နယ် စည်ပင်သာယာရေးကော်မတီဝင်များ၊ ဈေးသူ/သားများ၊ မြို့မိ/ဖများ တက်ရောက်ခဲ့ကြောင်း သတင်းရရှိသည်။

Source : ပဲခူးတိုင်းဒေသကြီး အစိုးရအဖွဲ့ သတင်းစာမျက်နှာမှ