Samsung ကထုတ်မယ့် Galaxy S10 Plus ရဲ့ သတင်းပေါက်ကြားမှုတွေဟာ ၂၀၁၈ နှောင်းပိုင်းမှာ သောင်းပြောင်းထွက်လို့ နေပါတယ်။ ဒါပေမယ့် တကယ်ထုတ်မယ့် Flagship အထင်ကရဖုန်းအနေနဲ့တော့ ပြည့်ပြည့်စုံစုံထွက်လို့ မလာသေးပါဘူး။

အခုတော့ 91Mobiles နဲ့ OnLeaks ကနေ Galaxy S10 Plus အကြောင်းထွက်လို့လာပါတယ်။ Galaxy S10 Plus ဟာ ယခင်ထွက်ထားတဲ့ Galaxy S10 ထက် အနည်းငယ်ကြီးလာဖို့ မျှော်လင့်ပါတယ်တဲ့။ ထွက်လာတဲ့ပုံတွေအပြင် 360 degree ရိုက်ပြထားတဲ့ဗီဒီယိုပါ ထွက်လာတဲ့အတွက် ပိုပြီးတိကျလာပါတယ်။ ဒီဒီဇိုင်းဟာ 2019 Superphone တွေအတွက် အိုင်ဒီယာအသစ်တွေကို ပေးစွမ်းနေပါတယ်။

ထွက်လာတဲ့ပုံမှာတော့ ကင်မရာသုံးလုံးကို ဖုန်းအနောက်ဘက်မှာတွေ့ရပြီး သုံးလုံးဟာ ရေပြင်ညီအတန်းလိုက်ပါ။ ကင်မရာတွေရဲ့ဘေးမှာ Flash မီး ကိုတွေ့နိုင်ပြီး နှလုံးခုန်နှုန်းကိုတိုင်းတာနိုင်တဲ့ကိရိယာလို့ထင်ရတဲ့ sensor ကိုလည်း တွေ့နိုင်ပါတယ်။

Galaxy Note 9 တို့ Galaxy S9 တို့နဲ့ မတူတာကတော့ Rear Fingerprint Scanner ကို မတွေ့မိပါဘူး။ အရှေ့ဘက်မှာလည်း Fingerprint scanner ကို မတွေ့တာကြောင့် Samsung ဟာ Display မှန်ပေါ်မှာ Fingerprint sensor တပ်မယ်လို့ ယူဆရပါတယ်။ ဒါပေမယ့် လက်ရှိဈေးကွက်ထဲက ဖုန်းတွေမှာတပ်ထားတဲ့ in-display fingerprint sensor တွေနဲ့ မတူတာကတော့ Samsung ဟာ Ultrasonic Sound ကို အသုံးပြုပြီး လက်ဗွေရာကို ခွဲခြားမှာပဲ ဖြစ်ပါတယ်။

အရှေ့ဘက်ကိုကြည့်ရင်တော့ Galaxy S10 ဟာ dual selfie camera ကို notch မှာ မဟုတ်တော့ပဲ ညာဘက်အပေါ်ထောင့်မှာ တပ်ဖို့များပါတယ်။ တကယ်လို့ selfie camera က ဒုတိယအလုံးဟာ facial recognition အတွက် သီးသန့်သုံးတာမဟုတ်တော့ရင်တော့ Galaxy S10 Plus မှာ ကင်မရာငါးလုံးပါဝင်တဲ့ပုံပဲ ဖြစ်ပါတယ်။ Facial recognition (မျက်နှာကိုမှတ်ထားတဲ့စနစ်) အတွက်ကတော့ နောက်ပိုင်းဖုန်းတွေမှာ လူတစ်ယောက်ရဲ့မျက်နှာထက် မျက်ဝန်းကို အဓိကထားဖတ်တဲ့စနစ် (iris scanner) တွေ အသုံးပြုလာနိုင်တယ်လို့ ယုံကြည်ပါတယ်။

ဖုန်းရဲ့အောက်ခြေမှာတော့ Speaker ပေါက်ကိုတွေ့နိုင်မယ့်အပြင် USB Type C port ရယ် headphone jack အပေါက်ရယ်မြင်ရမှာပါ။ headphone jack အပေါက်ပါတာကို တွေ့ရခြင်းအားဖြင့် Samsung ဟာ နားကြပ်ပေါက် ဖျောက်တဲ့ဒီဇိုင်းရေစီးကြောင်းထဲကို မရောက်သေးဘူးဆိုတာ ပြသထားပါတယ်။ ညာဘက်အခြမ်းမှာတော့ Power နဲ့ Volume ခလုတ်ရှိနေပြီး Samsung ရဲ့ Digital Assistant ဖြစ်တဲ့ Bixby ခလုတ်ကို ဘယ်ဘက်အခြမ်းမှာ တွေ့နိုင်ပါလိမ့်မယ်။ အပေါ်မှာတော့ SIM slot နဲ့ secondary mic ကို တွေ့နိုင်မှာပါ။ Model တစ်မျိုးကတော့ Huawei စတိုင် အရောင်ပြေး (Gradient color scheme) ကို အသုံးပြုထားတာတွေ့နိုင်ပြီး တကယ်ထွက်လာတဲ့အခါမှာတော့ အရောင်ပြေးပုံစံတွေ ခပ်များများတွေ့ရဖို့ မျှော်လင့်ပါတယ်။