Internet Explorer ဇာတ်သိမ်း

Microsoft Windows ဆိုရင် Computer အသုံးပြုသူတိုင်းသိတဲ့ Operating System တစ်ခုပါ။ Windows 10 မတိုင်ခင် Windows 7 အထိ Microsoft က အင်တာနက်အသုံးပြုဖို့ရာ Built-in Browser အဖြစ် Microsoft Internet Explorer ကို တစ်ပါတည်း ထည့်သွင်းထားတာကိုလည်း တွေ့ရမှာပါ။ IE (Internet Explorer) ဟာ 2015 ကတည်းက နည်းပညာဆန်းသစ်မှုတွေ ဆက်မလုပ်တော့ဘဲ ချောင်ထိုးထားရာမှ လေးနှစ်အကြာ (၂၀၁၉) မှာ Microsoft ရဲ့ Cyber Security Specialist တစ်ဦးက IE ကို နှုတ်ဆက်ဖို့ အချိန်ရောက်ပြီဆိုတာ သူ့ရဲ့ blog မှာ ရေးထားပါတယ်။

ဘာကြောင့်လဲ?
ယနေ့ခေတ်အင်တာနက်ကြီးဟာ နည်းပညာအသစ်တွေနဲ့ လှပစွာတင်ဆက်ထားပေမယ့် IE ကတော့ ၎င်းဆန်းသစ်မှုတွေကို အမှီလိုက်ဖို့ လက်နက်ကိရိယာတွေ မစုံလင်တော့တာကြောင့်ပါပဲ။

ယင်းရေးသားထားတဲ့ “IE ကို သင့်ရဲ့ default browser အဖြစ်သုံးနေဦးမယ်ဆိုရင် တွေ့ရမယ့်ဘေးအန္တရာယ်များ” ဆိုတဲ့ blog မှာ လူတိုင်းဟာ IE ကို အသုံးပြုနေတာ ရပ်တန်းကရပ်သင့်ပြီဟု ပြောကြားထားပါတယ်။ Microsoft ဟာ အသစ်အသစ်တွေ ပေါ်ထွက်လာတဲ့ web standard တွေအတွက် IE မှာ အလုပ်လုပ်စေဖို့ အထောက်အပံ့မပေးနိုင်တော့ကြောင်း၊ အခြား browser တွေမှာ အဆင်ပြေပြေနဲ့ အသုံးပြုလို့ရနေပေမယ့် IE ကတော့ “a compatibility solution” ဆိုတာနဲ့ အသက်ဆက်နေရကြောင်း၊ developer တွေဟာ IE ပေါ်မှာ စမ်းသပ်တာထက် ယနေ့ခေတ် အင်တာနက် browser တွေပေါ်မှာပဲ စမ်းသပ်နေကြကြောင်းကိုလည်း ပြောကြားလိုက်ပါသေးတယ်။ (Web design language တွေမှာလည်း IE ပေါ်မှာ အလုပ်လုပ်စေဖို့ သီးသန့် code တွေကို declare လုပ်ရပါတယ်။)

Microsoft ဟာ ယခုကဲ့သို့ အမွေစားအမွေခံထုတ်ကုန်တစ်ခုဖြစ်တဲ့ IE ကို ရပ်တန်းကရပ်ပစ်ဖို့ လုပ်နေတဲ့အချိန်မှာ ၎င်း specialist က IE ကို Enterprise Solutions တွေအတွက် ဆက်လက်အသုံးပြုနေတာတော့ အဆင်ပြေနေသေးပေမယ့် main browser အဖြစ်တော့ ထာဝရအားမကိုးသင့်ကြောင့် ထည့်ပြောထားပါတယ်။ ကုမ္ပဏီအများအပြားက IE အစား အခြား browser တွေကို ပြောင်းလဲအသုံးပြုနေပေမယ့် အချို့ကုမ္ပဏီတွေကတော့ ဒွိဟဖြစ်နေဆဲပါ။

Microsoft ရဲ့ Windows 10 မှာ မိတ်ဆက်လိုက်တဲ့ Microsoft Edge browser ဟာ အောင်မြင်မှုမှတ်တိုင်တစ်ရပ်ပါ။ Microsoft ရဲ့ အမှားကြီးတစ်ရပ်ကတော့ Microsoft Edge ကို Windows 7, Windows 8 နဲ့ Windows XP တွေပေါ်မှာ အသုံးပြုလို့ရအောင် မလုပ်ပေးတာပါပဲ။ ဘာဖြစ်လို့လဲဆိုတော့ အဆိုပါ Operating System သုံးခုဟာ ယနေ့အချိန်အထိ Market Share 50% လောက်ရှိနေသေးပါတယ်။ (Windows 10 မှာ Built-in Internet Browser အဖြစ် Microsoft Edge ကို အသုံးပြုလိုက်ပြီး Microsoft Internet Explorer မပါဝင်တော့ပါဘူး။) Software Maker တွေကတော့ Microsoft Edge ကို Windows 7 နဲ့ Windows 8 တို့မှာ အသုံးပြုလို့ရအောင် Chromium Version အဖြစ် ရေးဆွဲနေပါပြီ။ မကြာခင် testing အနေနဲ့ မြင်တွေ့ရတော့မှာဖြစ်ပြီး 2019 ထဲမှာ Stable ထွက်ပေါ်လာဖို့ မျှော်လင့်မိပါတယ်။ ဒီ Chromium version of Edge ဟာ Internet Explorer ရဲ့ ပုံစံဟောင်းကြီးနဲ့တော့ တော်တော်လေး သွေဖည်နေမှာပါလို့ ဆိုပါတယ်။

ဒါ့ကြောင့် ၂၀၁၉ အတွင်းမှာ မိမိရဲ့ဒစ်ဂျစ်တယ်လုံခြုံရေးစနစ်တွေပါ ထိခိုက်စေလာနိုင်မယ့် Microsoft Internet Explorer အစား အခြား browser တွေဖြစ်တဲ့ Google Chrome, Mozilla Firefox အစရှိတဲ့ Browser တွေကို ပြောင်းသုံးကြဖို့ ကျွန်တော်တို့ Taungoo.Net ကပါ ထပ်ပြီးတိုက်တွန်းပေးလိုက်ပါတယ်။