ကိုဝဝက သူ့သားကို စာပေတွေ ဗဟုသုတတွေနဲ့ ပြည့်စုံနေအောင် စာအုပ်စင်လေး လုပ်ပေးထားတယ်။
စာအုပ်တွေလည်း ဝယ်ပေးထားတယ်။
ကလေးများအတွက် သုတပဒေသာသိုက်တို့၊ လစဉ်ထုတ် ကလေးဂျာနယ်တို့၊ ပုံဆွဲစာအုပ်တို့နဲ့ စာအုပ်စင်လေးပေါ့။
သားငယ်က ဒီနေ့တော့ သုတပဒေသာစာအုပ်တစ်အုပ်ကို ဟိုလှန် ဒီလှန်လုပ်နေတယ်။ သူနားမလည်တာတွေက အများကြီး။
သူ့အဖေကို မေးမလို့ လှည့်ကြည့်တော့ ပက်လက်ကုလားထိုင်ပေါ်မှာ ငိုက်နေတဲ့ ကိုဝဝ ...
သားငယ်က စာအုပ်ကိုဆွဲယူပြီး သူ့အဖေနားကိုကပ်သွားတယ်။
သူ့အဖေကို လှုပ်နှိုးပြီး ...
သားငယ် ။ ။ ဖေဖေ ... ဖေဖေ ... ထ,ဦး ... ဒီမှာ သားနားမလည်လို့ ...
ကိုဝဝ ။ ။ (အိပ်ချင်မူးတူးဖြင့် ခါးမတ်လိုက်ကာ) ဟမ် ... အော် ... အေး အေး ... ဘာမေးမလို့လဲ သား ...
သားငယ် ။ ။ (သူဖတ်နေတဲ့စာမျက်နှာကို လက်ညှိုးထိုးပြကာ) ဒီမှာလေ ဖေဖေ ... အာဖရိကတိုက်က ယောက်ျားတွေက သူတို့ မိန်းမတွေကို လက်မထပ်ခင်အထိ မသိဘူးဆို ... ?
ကိုဝဝ ။ ။ (မဒမ်ဝဝရှိရာ မီးဖိုချောင်ကို တစ်ချက်လှမ်းကြည့်ပြီး) အေး ... မှန်တာပေါ့ ... အဲ့ဒါက ဒီနိုင်ငံမှာရောပဲ ... ယောက်ျားတွေက လက်မထပ်ခင်အထိ သူတို့မိန်းမတွေ အကြောင်း လုံးဝမသိခဲ့ဘူး ...